Իտալական Ա Սերիայի 3-րդ տուրից հետաձգված խաղում «Յուվենտուսը» սեփական հարկի տակ 2:1 հաշվով առավելության հասավ «Նապոլիի» նկատմամբ։

«Ծեր Սինյորան» մեկական գոլ խփեց յուրաքանչյուր խաղակեսում։ 13-րդ րոպեին հանդիպման հաշիվը բացեց պորտուգալացի ռմբարկու Կրիշտիանու Ռոնալդուն։ Հարկ է նշել, որ այդ գոլում իր մեծ ներդրումն ուներ գոլային փոխանցման հեղինակ Ֆեդերիկո Կյեզան, որն աջ եզրում փայլուն կերպով շրջանցեց երկու մրցակցի, որից հետո կատարեց վճռորոշ փոխանցումը։

Չնայած բազմաթիվ փորձերին, «Նապոլիին» չէր հաջողվում բեկել խաղի ընթացքը։ Ջենարո Գատուզոյի գլխավորած թիմը բազմաթիվ հարվածներ կատարեց, սակայն ապարդյուն։ Իսկ արդեն 73-րդ րոպեին «Յուվենտուսի» առավելությունը կրկնապատկեց Պաուլո Դիբալան, որը Բենտանկուրի փոխանցումից հետո տուգանային հրապարակից գնդակն ուղարկեց դարպասի հեռավոր անկյունը։

Հանդիպման վերջնամաում Ջենարո Գատուզոյի թիմին, այնուամենայնիվ, հաջողվեց կրճատել հաշվի տարբերությունը։ Նշանակված 11 մետրանոցը դիպուկ իրացրեց Լորենսո Ինսինյեն։ Սակայն նեապոլցիներն ավելին անել չկարողացան։

«Յուվենտուսն» այս հաղթանակից հետո վաստակեց 59 միավոր և եզրափակում է լավագույն եռյակը։ «Նապոլին» 56 միավորով 5-րդն է։